श्रमजीवी संघटनेच्या वतीने आज डहाणु पंचायत समिती कार्यालयावर विविध प्रलंबित प्रश्नांकडे प्रशासनाचे लक्ष वेधण्यासाठी भव्य मोर्चा काढण्यात आला. या मोर्चामध्ये परिसरातील नागरिक, महिला तसेच संघटनेचे पदाधिकारी व कार्यकर्ते मोठ्या संख्येने सहभागी झाले होते. विविध शासकीय योजनांचा लाभ मिळविताना नागरिकांना येणाऱ्या अडचणी आणि प्रलंबित कामांबाबत यावेळी प्रशासनाकडे ठोस मागण्या करण्यात आल्या.
विशेषतः आधार कार्ड दुरुस्ती व नवीन आधार कार्ड, जन्म दाखले मिळण्यातील अडचणी तसेच घरकुल योजनेतील प्रलंबित प्रकरणे याकडे मोर्चेकऱ्यांनी प्रशासनाचे लक्ष वेधले. ग्रामीण व आदिवासी भागातील अनेक नागरिकांना आवश्यक कागदपत्रांसाठी वारंवार शासकीय कार्यालयांच्या फेऱ्या माराव्या लागत असून, त्यातून नागरिकांचा वेळ आणि पैसा खर्च होत असल्याचा मुद्दा संघटनेच्या वतीने उपस्थित करण्यात आला.
घरकुल योजनेअंतर्गत पात्र लाभार्थ्यांची प्रकरणे तातडीने निकाली काढावीत, गरजू कुटुंबांना घरकुलाचा लाभ मिळावा, जन्म दाखले व आधार कार्डसंबंधीची कामे सुलभ पद्धतीने करून देण्यासाठी विशेष व्यवस्था करावी, अशी मागणी यावेळी करण्यात आली.
मोर्चादरम्यान संघटनेच्या पदाधिकाऱ्यांनी प्रशासनासमोर नागरिकांच्या विविध समस्या मांडत त्या तातडीने सोडविण्याची मागणी केली. शासकीय योजना या सर्वसामान्य नागरिकांच्या हितासाठी असून पात्र लाभार्थ्यांना त्यांचा लाभ मिळणे हा त्यांचा अधिकार आहे, अशी भूमिका श्रमजीवी संघटनेने व्यक्त केली.
